У арганізацыі беларускіх сілавікоў чарговы скандал. Удзень 8 чэрвеня ў тэлеграм-канале «Мая краіна Беларусь» з’явілася відэа кіраўніка арганізацыі Аляксандра Азарава, у якім ён паведаміў пра захоп сацыяльных сетак BYPOL звольненым супрацоўнікам Мацвеем Купрэйчыкам. Бліжэй да вечара тэлеграм-канал BYPOL паведаміў, што ў чальцоў праўлення аднайменнага фонду паўсталі пытанні што да фінансавых аперацый, якія праводзілі Аляксандр Азараў і Станіслаў Лупаносаў, яшчэ адзін супрацоўнік арганізацыі былых сілавікоў. «Люстэрка» паразмаўляла з Аляксандрам Азаравым і паспрабавала разабрацца ў сітуацыі.
Мы таксама звязаліся і з Мацвеем Купрэйчыкам, ён пацвердзіў, што зварот у афіцыйным тэлеграм-канале апублікаваны ад яго імені і імені звольненых супрацоўнікаў. Ад каментароў на гэты момант ён адмовіўся, паабяцаўшы, што яны будуць пазней.
— Давайце пачнем з пачатку. Як гэта ўсё адбылося і колькі людзей сышло з BYPOL?
— Не, гэта я не каментую. Можаце паглядзець два мае відэа. Першае — апытанне на тэму «Ці павінныя супрацоўнікі BYPOL праходзіць паліграф?». 79% адказалі, што павінныя абавязкова. А другое відэа пра тое, што тыя, хто не прайшоў паліграф, былі звольненыя.
Можаце дадаць, што мы цяпер заклікаем людзей, якія хочуць працаваць у BYPOL, звяртацца да нас. І абавязкова перад найманнем на працу трэба будзе прайсці паліграф. На вызваліленыя месцы мы шукаем новых людзей.
— На якія пазіцыі вы шукаеце новых супрацоўнікаў?
— У нас сакрэтная арганізацыя, мы не можам называць пазіцыі. Хай людзі пішуць, а мы будзем разбірацца, як і для чаго яны могуць быць карысныя.
— Як вы пракаментуеце інфармацыю, якая сёння вечарам з’явілася ў афіцыйным тэлеграм-канале BYPOL, пра тое, што ў чальцоў праўлення фонду BYPOL паўсталі прэтэнзіі да вас і Станіславу Лупаносава з нагоды фінансавых аперацый фонду?
— BYPOL захоплены звольненым супрацоўнікам Мацвеем Купрэйчыкам. Таму ў тэлеграм-канале ён можа публікаваць усё, што яму прыйдзе ў галаву.
— То-бок гэта толькі яго пазіцыя — ці яшчэ і іншых супрацоўнікаў BYPOL?
— Я не ведаю, чыя гэта пазіцыя. Я ведаю, што супрацоўнікі, якія адмовіліся праходзіць паліграф на патрабаванне беларускага народа, паводле апытання, былі звольненыя. Бо мы з такімі людзьмі працаваць не можам. Мы адказваем перад беларускім народам.
— Як вы збіраецеся рэагаваць на гэта? Сітуацыя выглядае так, быццам у BYPOL адбыўся раскол.
— Гэта не раскол. Гэтае правіла любой арганізацыі — калі чалавек не выконвае патрабаванні, яго звальняюць.
— Патрабаванне праходзіць паліграф — гэта вынік правядзення апытання?
— Гэта патрабаванне нашай арганізацыі. Мы праходзім яго рэгулярна, на пастаяннай аснове. Неабходнасць у гэтым паўстала разам з нашай арганізацыяй. Гэта абавязковае правіла, бо інакш ніяк не пацвердзіць, супрацоўнічае чалавек са спецслужбамі ці не. Паліграф — гэта тэст на сумленнасць.
— Як атрымалася, што доступ да сацыяльных сетак BYPOL быў толькі ў аднаго чалавека?
— Гэты чалавек зарэгістраваў нашыя сацыяльныя сеткі на сябе асабіста, і ён адмаўляўся перадаваць доступ да іх арганізацыі.
— Як даўно ён зарэгістраваў іх на сябе?
— З моманту заснавання арганізацыі.
— То-бок з 2020 года?
— Так
— Чаму два з паловай гады да гэтага чалавека ў вас не было прэтэнзій, а цяпер яны з’явіліся?
— Таму што ён у катэгарычнай форме адмовіўся праходзіць паліграф. Усе, хто адмовіўся, былі звольненыя. BYPOL не можа супрацоўнічаць з людзьмі, якія не могуць пацвердзіць сваю сумленнасць шляхам праходжання паліграфа. Усе прайшлі паліграф, тыя, хто адмовіўся, былі звольненыя. Трэба наводзіць парадак.
— Мацвей Купрэйчык раней праходзіў паліграф?
— Супрацоўнікі праходзяць яго рэгулярна. Але спецслужбы рэжыму працуюць над тым, каб вербаваць супрацоўнікаў розных дэмакратычных сіл кожны дзень. Сёння ты прайшоў паліграф, а заўтра цябе завербавалі. Таму паліграф трэба праходзіць рэгулярна, тады ён эфектыўны. Цяпер прыйшоў момант праходзіць паліграф, і тыя, хто адмовіўся, былі звольненыя.
— Калі гэта адбылося?
— На гэтым тыдні.
— Што будзе са звесткамі тых беларусаў, якія пісалі ў вашыя сацыяльныя сеткі? Мы не гаворым цяпер пра план «Перамога», пра гэта вы расказалі ў відэа.
— Я не ведаю, гэта складанае пытанне. Мне трэба ўдакладніць гэта. У сацыяльныя сеткі амаль не пісалі, асноўная сувязь — праз тэлеграм-боты. Сацыяльныя сеткі захопленыя Мацвеем Купрэйчыкам, і мы хочам іх вярнуць («Люстэрка» напісала ў тэлеграм-бот BYPOL, там нам адказалі, што ён пад кантролем аб’яднання, а вось сам тэлеграм-канал аб’яднання і YouTube-канал — пад кантролем Купрэйчыка і іншых звольненых супрацоўнікаў. — Заўв. рэд.).
— Ці звярталіся вы ў польскую паліцыю для гэтага?
— Мы будзем звяртацца ў паліцыю ў найбліжэйшы дзень. Сацыяльныя сеткі былі захопленыя толькі ўчора. Учора ж мы звольнілі ўсіх гэтых таварышаў.
— Дык колькі ж іх у выніку звольнілі?
— Гэтая інфармацыя канфідэнцыйная, я не магу казаць. Усе, хто не прайшоў паліграф, былі звольненыя.
Чытайце таксама
